Hildegunn Hovde

Hildegunn Hovde (f. 1980) er songar, musikar og komponist frå Vågå i Gudbrandsdalen, og bur på Lauvstad i Volda. Ho er utdanna innan klassisk song og komposisjon med ein master frå Norges Musikkhøgskole, og arbeider som frilansar i tillegg til å undervise i musikk ved Høgskulen i Volda. Hildegunn har ei rekke plateinnspelingar, bestillingsverk og prosjekt bak seg innan ulike sjangre, og arbeider hovudsakleg med vokal folkemusikk og utøvarbasert komposisjon.

Ho utforskar stemme, instrument og objekt frå naturen i møte med live elektronikk. Komposisjonane hennar ligg i skjeringspunktet mellom vokal folkemusikk og improvisert samtidsmusikk, i møtet mellom gammalt og nytt. For tida arbeider ho med eit tverrkunstnarisk prosjekt der ho eksperimenterer med fleirkanalslyd og dyrebein som utgangspunkt for musikk.